Saturday, 4 August 2012

मैथिली गजल

रोज उठैछी भोरे-भोरे
घूमि अबैछी भोरे-भोरे |


दूर-दूर धरि हरियर धरती
देखि अबैछी भोरे-भोरे |


धरती  मैया सभहक मैया
निहुरि कहैछी भोरे-भोरे |



आम डारि पर गाबय  कोइली
गीत सुनैछी भोरे-भोरे |


माए-बाबू भगवान हमर छथि
चरण छुबैछी  भोरे-भोरे |


माटि-पानि ले' तन-मन-जीवन
प्रण ई करैछी भोरे-भोरे |


(प्रकाशित - विदेह -ई, १ अगस्त २०१२ )

Wednesday, 27 June 2012

बेटी



बेटी

घरसँ   होउ   बहार  बेटी
बाट  तकैछ  पहाड़  बेटी |

खपटा थिक सोना आ चानी
उत्तम  स्नेहक  धार  बेटी |

गेल जमाना तिलक दहेजक
सरस्वतीक  संसार   बेटी |

नैहर सासुर  तीर्थ धाम सब
भऽ गेल आइ  बजार बेटी |

आब पताल ने  जेती सीता
सुन्दर  यैह   विचार  बेटी।


प्रकाशित :- "विदेह", अंक ‍१०८, ‍१५ जून २०‍१२


सऽमधि एला बनि-ठनि कऽ / मैथिली गीत -डहकन



सऽमधि एला बनि-ठनि कऽ





सऽमधि एला बनि - ठनि कऽ ।
धोती - कुरता   पहिरि   कऽ ।
                                 एला डहकन  सुनऽ बेटाके बियाहमे |


हम  सब   करै  छी   पुछारि ।
बाजू  गीत  सुनब  कि  गारि ।
                                 आ कि उलहन सूनब बेटाके बियाहमे |



ककरा  सँ माँगि कऽ धोती पहिरलौं,
ककरा   सँ   लेलियै    कुरता ।
ककरा सँ लेलियै पाग आ मिरजइ,
ककरा   सँ   लेलियै    डोपटा ।

के..हेन अछि छोटका ख....दान ।*
घिने..लौं  मुइलो  बापक  नाम ।
                                तेँ तँ उलहन दै छी बेटाके बियाहमे |


लाजो  ने  भेल जे टाका गनेलियै ।
बेटाकेँ बेचि  कऽ  खेतो किनलियै ।

कहू  तँ  कारी - चून  लगा  दी ।
अहाँ  केँ  गदहा  पर  बैसा  दी ।
                                गामक परिछन करब बेटाके बियाहमे |


पएरमे  बेमाए  अछि   फाटल,
तँ  कोना कऽ एलियै यौ बूढ़ा ।
दाँत  अछि  एको  ने  बाँचल,
तँ  कोना   चिबेलियै   चूड़ा ।

अजगुत    लऽगैए    गे   दाइ !

बुढ़बा  टुप - टुप  खेने  जाइ !
                              बुढ़बा मारल जेतै बेटाके बियाहमे |





 छोटका ख....दान = छोट / निकृष्ट विचारधारा बला खनदान = एहि पाँतिक जातिगत वर्गीकरण सँ कोनहु लेन – देन नञि थिक




( रचना : १९७६ : शशिकान्तजी - सुधाकान्तजी द्वारा विभिन्न मंच पर प्रस्तुत कयल गेल )

गजल सुनायब



गजल सुनायब



 हम    तमसायब    गजल   सुनायब 
अहाँ  अगुतायब  गजल  सुनायब |
 
ई  सौंसे   आकाश   हमर  छी
उड़ि-उड़ि आयब गजल सुनायब |

माइक  करजा  माटिक  करजा
हमहूँ चुकायब  गजल सुनायब |

पाप  कते  भरि  गेल   मोनमे
गंगा बनायब  गजल  सुनायब |

लगतै   आगि   अहू  जंगलमे
कतहु पड़ायब  गजल सुनायब |

अहाँक  हृदयमे घऽर हमर अछि
घुरि–घुरि आयब गजल सुनायब |

ताकब  बाट  अहाँक जीवन भरि
सपन सजायब  गजल सुनायब |







प्रकाशित :- "विदेह", अंक ‍१०८, ‍१५ जून २०‍१२

Thursday, 14 June 2012

अहाँ जे रुसलियै

  
अहाँ जे रुसलियै


    अहाँ  जे  तकलियै   हम   बुझि  गेलियै
    ताकि  मुसुकेलियै  हम  बुझि   गेलियै |


   कोइली   कुहुकलै   आमक   डारि   पर
   अहाँ  जे  बजलियै  हम  बुझि  गेलियै |


   रिमझिम-रिमझिम साओन आ भादो
   अहाँ  जे  कनलियै  हम  बुझि  गेलियै |


   गुमकीक  बाद  बिजलोका  आ अन्हड़
   अहाँ  चुप  भेलियै  हम  बुझि  गेलियै |


 रुसबाक  मतलब  ई  दुनिञा  हमर छी
    अहाँ  जे   रुसलियै   हम  बुझि  गेलियै |  




    

शशिकांतजी-सुधाकांतजीक चिठ्ठी

                                                                                                                               लहेरियासराय
                                                                                                                               ७.३.८४

प्रिय अनिलजी,
                     जय मैथिली |
                     कुशल छी एवं कुशलापेक्षी |
                     अहाँक पत्र भेटल |  बड प्रसन्नता भेल जे अहाँ लहेरियासराय  आबि रहल छी |
                     आशा अछि जे शीघ्र भगवतीक कृपासं अहाँ एहि ठाम आयब | कारण आब एते
                     पियास लागल अछि जे जुनि पूछू | पूरा संकल्पलोक परिवार प्रतीक्षामे अछि |
                     आशा अछि अहाँ सपरिवार प्रसन्न होयब |
                     नव-नव गीत एवं लयक संग हम सब आशा करैत छी जे अहाँ आबि रहल छी |

                     अहांक
                      
                      शशिकांत
                      सुधाकांत
                      उमाकांत
                      कमलकांत

भाइ साहेब ( श्री राज मोहन झा)क़ चिठ्ठी

                               

                                                                                                                 सावित्री-कुटीर
                                                                                                                 घग्घाघाट रोड,पटना -८००००६
                                                                                                                  २.५.०१

प्रिय अनिलजी,
आशा जे सानंद होयब |
अहाँ अपन १८.२क पत्र द्वारा सूचना देने रही जे सदस्यता शुल्क मनीआर्डर द्वारा जा रहल अछि |
मुदा से अद्यावधि नहि भेटल अछि | कृपया पता लगाबी |

                                 आरम्भक अगिला अंक एखन धरि नहि बहार  भ' सकल अछि | गाम पर जे
छोट भाय रहै छलाह, तिनक आकास्मिक देहावसान सं गाम परक व्यवस्था आदिमे व्यस्त भ' जाय
पड़ल, आबो छी | तें लिखाई-पढाईक काजमे व्यवधान आबि गेल अछि |
                                                     शेष कुशल |
                                                                                 अहांक
                                                                                 राजमोहन

Tuesday, 6 March 2012

पाथर कें भगवान बुझै छी / मैथिली गीत

                  पाथर कें भगवान बुझै छी              



पाथर केँ  भगवान बुझै छी,  धन्य अहाँ !
भगवानक अपमान करै छी, धन्य अहाँ !!



ब्रह्म थिका ओ जे आतुर छथि
सुन्दर सृष्टि रचै ले'
आओर मनुक्खक जीवन मे
आनन्दक वृष्टि करै ले'

की हुनकर सम्मान करैछी ? धन्य अहाँ !
भगवानक अपमान करै छी, धन्य अहाँ !!



जनिक  पसेना सँ धरती सँ, 
उपजय गहुम आ धान 
गछी - बिरछी मे लुबुधैए, 
जामुन - आम – लताम । 

की ओइ विष्णुक ध्यान करै छी ? धन्य अहाँ !
भगवानक  अपमान  करै  छी,    धन्य अहाँ !!



जे देश - समाजक खातिर,
छथि करइत विष – पान । 
आ अखण्ड भारत केर जिनका सँ, 
भेटल वरदान 

शिव छथि, नहि अनुमान करैछी, धन्य अहाँ !
भगवानक अपमान  करै  छी,  धन्य अहाँ !!





( प्रकाशित : समय -साल / मई-जून २०११ )



पत्रिका नञि किनै छी / मैथिली गीत


पत्रिका नै किनै छी


पत्रिका  नञि  किनै   छी 



पत्रिका  नञि  किनै   छी 
अखबार   नञि  पढ़ै  छी 
बुझिए  क हम  की करबै,
समाचार  नञि  सुनै छी ।।



दूर   कियो   भोंपू   सँ, 
बेर  -  बेर    चिकरैए 
सत्य   अहिंसाक  मन्त्र,
हमरे - टा    सिखबैए ।

कथनी   आ  करनी   मे,
सरोकार  नञि देखै छी ।।



फुइट   गेल   तमघैल,
छुतहर   ने   फूटल ।
फूल  उपटि गेल, मुदा 
काँट   गेल  चतरल ।

दूर,   बहुत  दूर  धरि,
अन्हार -  टा देखै छी ।।



बगुलाक  आँखि देखल,
कौआक  पाँखि देखल 
साँपक गरा मे अँटकल,
बेंगोक   देह   देखल 

भादोक  बेंग  सँ   हम, 
अधिकार नञि मँगै छी ।।



सभतरि  देवाल   पाइक,
सभतरि   सवाल  पाइक 
सभ  ठाम  पाइक बरखा,
सभ ठाम अकाल पाइक 

पाइक     बियाधि    केर,
कोनो उपचार नञि देखै छी ।।





( प्रकाशित : समय -साल / मइ - जून २०११ )





पटनाक मजा लीयऽ / मैथिली गीत

पटनाक मजा लीय                                   



जुलुस केर मजा लीयऽ ।
     रैली केर मजा लीयऽ ।
                            जँ   लागि   गेल   लाठी,
               इस्स - इस्स केर मजा लीयऽ ।।





पटनाक  मजा लीयऽ ।
दिल्लीक मजा लीयऽ ।
बेकार छी अहाँ तँ,
बम्बइक मजा लीयऽ ।।


बजबाक मजा लीयऽ ।
खयबाक मजा लीयऽ ।
लाचार छी अहाँ तँ,
देखबाक मजा लीय ।।



चलि  दीय तेम्हर,
डेग  उठय जेम्हर ।
बस चढ़ू,  ट्रेन चढ़ू,
पकड़ू     इस्टीमर ।


रिक्शाक  मजा  लीयऽ ।
टमटम केर मजा लीयऽ ।
अछि खाली जँ जेबी
पैदल केर मजा लीय ।।



चलू - चलू ओम्हरे,
भीड़  देखू जेम्हरे ।
हउए  देखू  जुलूस,
आबि रहल एम्हरे ।

जुलुस केर मजा लीयऽ ।
रैली  केर मजा लीयऽ ।
जँ   लागि   गेल   लाठी,
इस्स-इस्स केर मजा लीयऽ ।।



छथि  मामा एमेले,
तँ भेँट      आउ 
मोनक  भरम  केँ,
मेटौनहि     जाऊ ।


बाबूक  नाम  लीयऽ ।
कक्काक नाम लीयऽ ।
इमप्लायमेंट एक्सचेंज मे,
धक्काक  मजा  लिय ।।




( रचना : १९७५ : शशिकान्तजी- सुधाकांतजी द्वारा कतेको मंच पर प्रस्तुत भेल )
                             

Wednesday, 22 February 2012

किछु ने किछु सदिखन सिखबाक मोन होइए


किछु ने किछु सदिखन सिखबाक मोन होइए




पढ़बाक   मोन   होइए,  लिखबाक  मोन   होइए,
किछु  ने  किछु सदिखन, सिखबाक  मोन होइए ।

अन्हड़ जे  रातिखन  एलै,  सब गाछ  डोलि गेलै,
टिकुला  कतेक  खसलै,  बिछबाक  मोन  होइए ।

सासुर  इनार  होइए     डोल  थिकहुँ  हमहूँ,
किछु ने किछु  एखनहुँ,   झिकबाक मोन होइए ।

अहाँ आबि  जे रहल छी,  सुनिकऽ  बताह  भेलहुँ,
गोबर  सँ  आइ  आङन,  निपबाक  मोन होइए ।

दुइ  ठोर  थीक   अथवा  तिलकोर  केर  तड़ुआ,
होइत अछि लाज लेकिन,  चिखबाक  मोन होइए ।

कोनो  ऑफिसक  चक्कर, लगबऽ  ने पड़ै  ककरो,
ई बीया  विचार क्रान्तिक, छिटबाक मोन होइए ।

आजादीक  लेल   एखनहुँ,  संघर्ष   अछि  जरूरी,
व्यर्थ  गेल  सब माँगब,  छिनबाक  मोन  होइए ।



“विदेह” पाक्षिक इ पत्रिका वर्ष ५, मास ५०, अंक ‍१०० मे छपल ।