हम – अहाँ

हम – अहाँ

गजल

चालनि मे नित पानि भरै छी हम – अहाँ ।

कतेक बरख सँ संग रहै छी हम - अहाँ ।।

अपन अपन दुनिञा मे हम सभ हेरा गेलहुँ

एक दोसर केँ कहाँ चिन्है छी हम - अहाँ ।

कते जतन सँ सींचै छी नवगछुली केँ

सभ दिन सपना नव देखै छी हम - अहाँ ।

भिनसर, दुपहर, साँझ, राति केर नाटक ई

हँसि कऽ कानी, कानि हँसै छी हम – अहाँ ।

माथक मोटा हल्लुक कहियो भेल कहाँ

रोज मरै छी, रोज जिबै छी हम - अहाँ ।

काल्हुक दिन होयत शुभ दिन हमरो सभ ले’

यैह सोचि सभ राति सुतै छी हम – अहाँ ।

नोर आँखि केर, एक दोसरक पोछब हम

चलू आइ संकल्प करै छी हम – अहाँ ।

“विदेह” – अंक ९७ – ०१ जनवरी २०१२ - मे प्रकाशित ।