Sunday 5 February 2012

तिलक प्रथा केँ बंद करू

     
तिलक प्रथा केँ बंद करू






हे  मिथिला  केर  भाग्य - विधाता,  नारा  आइ  बुलंद  करू
चाही    जँ   उद्धार    मैथिलीक,    तिलक    प्रथाकेँ     बंद     करू ।।


छथि         उदासे    बहिन   मैथिली,
आइ            जागृतिक             भोरमे ।
स्नेह   ने       पाबि   रहलि    बेचारी ,
अपनो             माइक              कोरमे
देखि मलिन आकृति निज जनकक,
डूबल             सदिखन            नोरमे

हो  पौरुष  तऽ  एहि  फंदा   सँ,  मिथिलाकेँ   स्वछन्द  करू ।
चाही    जँ   उद्धार    मैथिलीक,    तिलक    प्रथाकेँ     बंद     करू ।।


परिणय  मे  काटर  केर  परिचय,
थीक          परम      व्यभिचार ।
अंत  होइछ की एहि    व्यभिचारक,
अछि      जनइत             संसार
दरकि रहल अछि  छाती जननिक,
देखि        ई            अत्याचार ।

प्रायश्चित करए समाज एहि पापक, सभ क्यो तकर प्रबंध करू ।
चाही    जँ   उद्धार    मैथिलीक,    तिलक    प्रथाकेँ     बंद     करू ।।


भाषन  आ  आश्वासन    दै छथि,
बड़का  -  बड़का                नेता
विश्व - समाजक अभिनेता     
नव      युग        केर   प्रणेता
फेकत  थूक बहिन        हुनका पर
जे     नहि         डेग    बढ़ेता ।

करू  दूर  ई रोग  समाजक ,  आब ने  अधिक  बिलम्ब करू ।
चाही    जँ   उद्धार    मैथिलीक,    तिलक    प्रथाकेँ     बंद     करू ।।


खेद जे हम मैथिल एखनो धरि,
अपने   घरमे     हेरायल  छी  ।
कारण  जे हम सभ एखनो धरि,
बाट  अपन         भोतियायल छी 
तेँ  ने  अपने  गाड़ल    कऽल मे,
हम   दिन - राति    पेरायल छी

विषम समस्या अपन समाजक,  सभक्यो मिलि कय अंत करू
चाही    जँ   उद्धार    मैथिलीक,    तिलक    प्रथाकेँ     बंद     करू ।।

 .
 .
 
( १९७८ मे प्रकाशित गीत संग्रह तोरा अंगना मेक गीत सं. ‍११ )
संगहि “गीतक फुलवारी” फुलवारी मे सेहो प्रकाशित ।


No comments:

Post a Comment