तोरा अङना मे

          

तोरा  अङना मे

तोरा  अँगना मे
                     वसंत नेने
                                 आएब सजना | तोरा  अँगना मे........


पीयरे ओहार बीच लाले रंग डोलिया
ताही बिच  कुहुकय प्राण   कोइलिया

           तोरे ले' पराती                    
                                 सुनैब सजना | तोरा  अँगना मे.........


आशक     पातिल,    प्रेमक    बाती
देखि    जुड़ायत,    दगधल   छाती

           सपने जकाँ कोहबर
                                  सजैब सजना | तोरा  अँगना मे.........


सेज  सजायब,  कल्पित उपवन
करब निछाउर,  तन-मन-यौवन

            नीलगगन सन
                                   बनैब सजना | तोरा  अँगना मे.........


नोर  बहा  कय थाकलि    नयना
उछिलय सिनेहक गंगा - यमुना

             संगे-संगे जी भरि
                                    नहैब सजना | तोरा  अँगना मे.........

( १९७८ मे प्रकाशित गीत संग्रह 'तोरा अँगना मे'क गीत क्र. १६ )

संगहि “गीतक फुलवारी” फुलवारी मे सेहो प्रकाशित ।